ХХ ғасырдың 70-ші жылдарында жел электр қондырғыларының(ЖЭҚ) дамуы жолында алғашқы ғылыми - зерттеу жұмыстары арқылы алынған оң экономикалық нәтижелер заманауи жел энергетикасының дамуына үлкен серпін алып келді. Жел электр қондырғысының өнімділігі әр түрлі шамалармен бағаланады және ол қандай жүктеме жұмыс істейтініне байланысты (жел қозғалтқышы қай жұмыс машинасымен байланысты).
Қазақстандағы жел энергетикасы серпінді даму үстінде. Еліміз әлемдік трендке сүйене отырып, ЖЭҚ электр станцияларының санын көбейту бойынша жоспарланған шаралар жүргізіп жатыр. ҚР Энергетика министрлігі берген мәліметке сүйенсек, ел аумағында жел қондырғыларын пайдалану 2010 жылдан бастау алған. Елордамызда қуаты 0,05 МВт болатын бірінші жел электр станциясы салынған. Сонымен қатар, мемлекетімізде ҚР Президенті бекіткен, елдің "жасыл экономикаға" көшуі жөніндегі тұжырымдамасы өз жұмысын бастады. Онда ЖЭҚ электр энергиясы өндіру үлесінің қажетті көрсеткіштері көрсетілген: 3% - 2020 жылға қарай, 10% – 2030, 50% – 2050. Жоғарыда айтылғандай, жел энергетикасы арқылы қойылған міндеттерге қол жеткізудің үлестік мөлшері үлкен болмақ.
Қазақстан үшін жел энергиясын қолдану мемлекетіміздің энергетикалық әлеуетін айқындайтын перспективалы бағыт болып тұр. Елімізде күшті желдері арқылы сипатталатын аудандар бар. Ол аймақтарға: Шу-Іле таулары, Қаратау жотасы, Мұғалжар тауы, Ұлытау таулары, Маңғыстау таулары, Ерейментау және т.б. жатады.
Әл-Фараби атындағы ҚазҰУ ғалымдарының айтуынша, еліміздегі жел энергия ресурсы мемлекетімізді электр энергиясымен түгел қамтуға жетеді. Өз зерттеулері және жарияланымдарымен экологиялық таза энергия көзін пайдалану бойынша бастапқы қатарларда ҚазҰУ қызметкерлері тұр. Жел энергетикасына мамандандырылған орталықтарға біліктілігі және кәсіби даярлығы жоғары мамандарды тарту қажет. Кадрлар даярлау және олардың шетелде тағылымдамадан өтуін ұйымдастыру қажет. Техникалық-технологиялық жұмыстарды қамтамасыз ету барысында жел энергетикасы сияқты басым бағыт бойынша ҚазҰУ бірінші болатынына күмәніміз жоқ.
