2019 жылы 02 қыркүйектегі Мемлекет басшысы Қасым-Жомарт Тоқаевтің «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына Жолдауында: «...Қазақ тілінің мемлекеттік тіл ретінде рөлі күшейіп, ұлтаралық қатынас тіліне айналатын кезеңі келеді деп есептеймін. Бірақ мұндай дәрежеге жету үшін бәріміз даңғаза жұмыс жасамай, жұмыла жұмыс жүргізуіміз керек. Сондай-ақ, тіл үлкен саясаттың құралы екенін де ұмытпаған жөн» деген болатын. «Рухани Жаңғыру» идеясының маңыздылығы да осыған сайып келетіні бәрімізге сөзсіз түсінікті. Олай болса, мектепке дейінгі тәрбие – ертеңгі күнге ашылатын білімің бастауы, сәбидің жеке тұлға болып қалыптасуының алғашқы баспалдағы. Алғашқы отансүйгіштік, патриоттық сезімдері отбасы мен балабақшадағы тәрбиеден бастау алады. Туғандарына, жақындарына деген махаббаты, туған өлкесіне, қаласына сүйіспеншілігі бала санасына ерекше әсер етіп, оған өмір бойы өшпестей із қалдырады.
Қазақстан Республикасының білім және ғылымды дамытудың Мемлекеттік бағдарламасында мемлекетіміздің басты міндеті болып «Мәңгілік ел» Жалпы ұлттық патриоттық идеясы бойынша рухани-адамгершілік құндылықтарды нығайту табылады. Ол әрине, мектепке дейінгі жастағы оқу үрдісінде бастау алатыны сөзсіз. Ал ұлттық идеяны жүзеге асыруда педагог маңызды рөл атқарады.
Қазақстан Республикасының «Білім туралы» заңында мемлекеттік тілді оқытуға ерекше назар аударылған. Қоғам дамуы, елдің әлеуметтік – экономикалық және мәдени саладағы жетістіктері білім беру жүйесіне де жаңа талаптар қойып отыр. Өркениетті қоғамға сай жастарға әлемдік деңгейде білім беру, олардың рухани байлығын жетілдіру, кәсіби біліктілігі мен іскерлік қабілетін қалыптастыру, өз елінің тарихын, әдебиеті мен мәдениетін, әсіресе, ана тілін оқыту – бүгінгі таңдағы басты өзекті мәселе болып табылады. Осы орайда, ана тілімізді оқытатын болашақ мамандарды даярлауға, оның теориялық білімі мен іскерлік дағдысын қалыптастырып, дидактиканың оқыту, білім беру жөніндегі теориялық қағидалары мен әдістеме заңдылықтарын меңгеруіне ерекше көңіл бөлінеді.
Сондықтан, Отанын сүйген нағыз патриоттарды, өз ана тілін қадірлеп, сол тілде сөйлейтін, ата-бабасы жүріп өткен тарихи жолдың жеңістерін ұрпақтан-ұрпаққа жеткізер болашақ ұрпақ өкілдерін, елінің нағыз жанашыр азаматтары ретінде қалыптасуға тәрбиелеу педагог мамандардың жауапты міндеті болмақ. Өскелең ұрпақты елінің дәстүрі, ұлттық құндылықтарымен тәрбиелеу қай заманда болсын басты мәселе болған. Елбасымыз «Қазақ тарихында біз ұялатын ештеңе жоқ. Бізге бабалар тұлпарларының тұяғымен жазылған ата тарихының әр парағы ерекше қымбат. Қазақтардың бүгінгі және болашақ буыны оны әрдайым орынды мақтан ететін болады», - деді. Салт-дәстүрімізді қастерлеп, электронды құралдар арқылы көрсету, тарихи оқиғаға байланысты ойларын айтқызу, қиялын шарықтату барысында отаншылдыққа баулу мектеп жасына дейінгі тәрбиеде өзі нәтижесін берері хақ.
Сондықтан, ертеңгі келер күннің бүгінгіден гөрі нұрлы болуына ықпал етіп, адамзат қоғамы алға апаратын құдіретті күш –білімге тән. Жас мемлекетіміздің болашағы-бүгінгі балалар. Оларға бірдей талап қойып, олардың табиғи қабілеттерін, нақты мүмкіндіктерін анықтап, соған негіздеп оқыту осы жұмыста ашылған.
1. Ақпараттық блок
1.1. Тәжірибенің тақырыбы
«Қазақ тілі сабағында ұлттық ойындар арқылы мектепке дейінгі жастағы балаларды патриоттық тәрбиелеуді қалыптастыру»
1.2. Тәжірибенің өзектілігі
Мемлекет басшысы Қасым-Жомарт Тоқаевтің: «Ұлы Абай өзінің алтыншы қара сөзінде «Бірлік – ақылға бірлік» дегенін білесіздер...Береке мен бірлік, ақыл мен парасат халқымызды үнемі алға бастап келеді» деп айтқандай, ұлттық мұраны жаңғырта отырып, бүлдіршіндерімізге тілді үйретуде ел дәстүрін қолдану білім беру сапасының да ажырамас бір бөлігі болып табылады. Балаларды ұлттық ойындар арқылы қазақ халқының ұлттық құндылығы және мәдениетімен таныстыру, мектепке дейінгі жастағы балаларды елжандылыққа тәрбиелеуде педагогтардың кәсіби шеберліктерін арттыру - оны жүзеге асыру технологиясы оның қатысушыларының әрекет етуінің әр түрлілігімен ерекшеленеді.
Аталған тақырыптың өзектілігі уақыт талабымен байланысты. Бәсекеге қабілетті әлемде өмір сүру ұлттық құндылықтарымызды білмей көз алдымызға елестету де қиынға соғары анық. Бүгінгі таңда еркін, білімді, жан-жақты дамыған жеке тұлға ғана бәсекеге төтеп бермек. Себебі, дәл сондай тұлға ғана үнемі өзгеріп тұратын мына заманда әлемдік қоғамдастыққа еніп, онда табысты қызмет етуі үшін коммуникативті қабілетке ие, ұлттық құндылығы мен тарихын толықтай меңгерген болуы тиіс.
1.3. Тәжірибенің мақсаты
- Мемлекеттік тілде әлеуметтік мәдени қарым-қатынасқа дайын мектепке дейінгі жастағы балалардың коммуникативті-тілдік жеке тұлғасын қалыптастыру
- Қазақ халқының ұлттық салт-дәстүрі мен ойындарымен таныстыру арқылы мектепке дейінгі жастағы балаларды елжандылыққа тәрбиелеуде педагогтардың кәсіби шеберліктерін арттыру.
1.4. Тәжірибенің міндеттері:
1) Балаларды ұлттық мәдениетке тарту үшін, қызығушылықтарын арттыру үшін ұлттық ойындарды қолдану қажеттілігін меңгеру.
2) «Қазақ тілі сабағында ұлттық ойындар арқылы мектепке дейінгі жастағы балаларды патриоттық тәрбиелеуді қалыптастыру» тақырыбы бойынша ойын топтамасы арқылы қазақ халқының салт-дәстүрлерін, ұлттық ойындарын қарастырып, жинақтау, жалпылау.
3) Бес тас, ханталапай, алшы, атқапыл және т.б. көптеген асық ойындары арқылы балалардың шығармашылық қабілеттерін дамыта отырып, сараптау.
4) Балалардың сөздік қорларын ұлттық ойындармен таныстыру, ойнау арқылы одан әрі байыту.
5) Балаларды патриоттылыққа тәрбиелеу бойынша сабақтан тыс іс-шараларға ата-аналарды тарту және ұйымдастыру.
6) «Қазақ тілі сабағында ұлттық ойындар арқылы мектепке дейінгі жастағы балаларды патриоттық тәрбиелеуді қалыптастыру» тақырыбы бойынша педагогтарға, ата-аналарға ұсыныстар беру.
