Қазіргі қазақстандық қоғамның саяси, экономикалық және әлеуметтік жағдайы, оның әлемдік білім кеңістігіне интеграциялануы білім жүйесінің барлық саласын жаңартуды талап етеді. Елбасы Н.Ә.Назарбаевтың Жолдауында «Білім беру реформасы жетістігінің басты өлшемі – тиісті білім мен біліктілікке ие бола алған еліміздің әрбір азаматы әлемнің кез-келген елінде сұранысқа ие болатын маман болатын деңгейге көтерілуі болып табылады» деп атап өтілген [1]. Соған орай, «ҚР білім беруді дамытудың 2011-2020 жылдарға арналған Мемлекеттік бағдарламасы» Жобасында еліміздің білім беру жүйесін түбегейлі модернизациялау, білім берудің сапасын жақсарту қажеттігі айтылған. Білім беру жүйесін жаңарту қоғам дамуының ажырамас бөлігі болып табылатын болғандықтан, білім беру үрдісіне қойылатын жоғары талаптар оны жаңа тұрғыдан ұйымдастыруды қажет етеді. Жаңа ұлттық 12-жылдық мектептің алдындағы негізгі міндеттердің бірі – жоғары білімділікке ие, құзыретті, өз бетімен маңызды шешімдерді қабылдай алатын, ізгіліктіктігі мен жауапкершілігі мол адамдарды қалыптастыру. Бұл міндеттер мектепте тиянақты білім беруді ғана емес, сондай-ақ оқушылардың түйінді құзіреттіліктерін қалыптастыруға бағытталған әрекеттерді талап етеді [2].
Білім берудің жаңа құндылықтары, білім алушылардың ақпараттық, коммуникативтік, проблеманы шеше білу және пәндік құзыреттіктері күтілетін нәтижелер ретінде белгіленіп отыр. Білім берудің жаңарған моделінде оқушының «дайын білімді алушы» қалпынан оның танымдық процестегі «белсенді субъект» қалпына көшуін қамтамасыз ететін коммуникативтік белсенділігін күшейтуге мән беріледі. Соған орай, аталған коммуникативтік құзыреттілік нәтижелерге бағытталған білім беру үрдісін ұйымдастыруды оқушылардың зерттеушілік іс-әрекеттері негізінде жүргізуге қажеттілік туындауда.
