Тәрбие мен білімнің алғашқы қадамы – мектепке дейінгі тәрбие ортасында беріледі. Отбасында ата – ананың ықыласы мен мейірімінен нәр алған бала балабақшада тәрбиешілердің жақсы қарым-қатынасына бөленеді. Баланың бойындағы жақсы қасиеттер мен дағдыларды дамытып, олардың өнегелі де тәрбиелі болып тәрбиеленіпеп шығуына балабақшаның маңызы зор. Баланың бақытты болуы үшін, денінің сау болуы үшін үлкен қамқорлық жағдай жасау керек. Дені сау баланың ақыл – ойы айқын, өз – өзіне сенімді, жан – жағына қуанышпен қарай білетіндей болуы шарт. Бала денсаулығының мықты болып, қозғалыс дене құрылысының дұрыс жетілуі мектепке дейінгі кезеңде қалыптасады.
Балабақшада оқу-тәрбие жұмыстарын заман талабына сай жүргізу, баланың денсаулығын сақтау мен нығайту мәселелерін тиімді шешу педагогикалық және психологиялық қызметкерлердің бірлескен нәтижелі еңбектеріне байланысты. Жалпы, психологиялық дені сау тұлға дегеніміз – ол шығармашыл, өмірге деген ризашылығы, ашық, көңілді, өзін және қоршаған ортасын танып, сыйлай білетін, түсіне білетін, өзгенің сезімін бөлісе білетін, жауапкершілікті сезіне алатын тұлға. Ол үнемі даму үстінде болады, оны дамытатын отбасы, қоршаған орта және балабақша. Психологиялық денсаулықтың деңгейлері: креативті, адаптивті, дезадаптивті болып үшке бөлінеді. Креативті (жоғары) ортаға жеңіл бейімделетін, стресстік күйлерден өтуге күші жететін, шынайылыққа шығармашылықпен келетін бала. Мұндай бала психологиялық көмекке аса қатты жүгінбейді. Адаптивті (орташа) көпшілік ортаға бейімделе алатын, бірақ мазасыздығы басымдау болатын балалар. Дезадаптивті (төмен) ортаға өздерінің жағымсыз қылықтарымен бағындыруға тырысатын балаларды жатқызады. Мұндай балалармен үнемі жеке жұмыстар жасап отыру қажет.
Психологиялық жағдайды қалыптастыру үшін, ойындар мен жаттығулар, жағымды әрі ырғақты әуен, сурет салу, қол қуыршақтары театры, ертегі әңгімелер, алаңдағы серуендер, тыныс алу және түрлі гимнастикалар зор әсерін тигізеді. Балаларда психологиялық жайлылықтың болмауының әсері қорқынышқа, мазасыздыққа, мінез-құлқының өзгеруіне және агрессияға ұшыратады. Психологиялық соққы алған бала физиологиялық тұрғыдан да ауырады. Осыған орай, балабақшада оқу-тәрбие жұмыстарын заман талабына сай жүргізу, баланың денсаулығын сақтау мен нығайту мәселелерін тиімді шешу медициналық, педагогикалық және психологиялық қызметкерлердің бірлескен нәтижелі еңбектеріне байланысты болады. Осындай мәселені шешу барысында бірден байқалатыны, баланың денсаулығын нығайтуда және аурудың алдын-алуда тек қана баланың қимыл белсенділіктерін көтеру ғана өте аз болады, сонымен қатар шынықтыру әрекеттерін жүйелі өткізу керек. Ол үшін педагог дәстүрлі жұмыстармен қатар дәстүрден тыс жұмыс түрлерінің жүйесін жүргізгені жөн. Мысалы, жалаң аяқ жүру табан мен буындарды бекіту әдісі болып табылғандықтан барлық жаттығуларды жалаң аяқ ұйымдастырған өте ұтымды болады.
