Білім берудің қазіргі заман талабы-шығармашылықпен жұмыс жасайтын, бәсекеге қабілетті, құзыретті тұлға тәрбиелеу.
Жалпы оқыту- мұғалімдердің оқушыларға жасаған сыйы емес, бұл құзыреттіліктер білім алу үшін оқушылардың өздері де оқу үдерісіне белсенді қатысуын талап етеді. Ал біз, мұғалімдер, өзіміздің сабақ беруге емес, оқушылардың оқу ептілігін дамытуға назар аударуға тиіспіз. Осыған байланысты оқушылар арасында өзара түсіністік және ұжымдық қарым-қатынасты орнатып, оқушылардың сенімсіздіктерін жойып, мүмкіндіктерін арттыру керек. Оқушылар жұмыс барысында орындайтын іс-әрекеттер тізбесін құру қажет. Білімнің мақсаты мен мазмұнына сәйкес келетін, оқушылардың оқу-танымдық біліктілігін қалыптастыруға себепші болатын, айқын анықталған, ұжыммен шығарылған, барлық оқушылардың оқу жетістіктерін салыстыру керек.
Оқу нәтижелігінің негізгі 5 түрі бар: оқу білімінің сандық ұлғаюы ретінде, оқу есте сақтау ретінде, ақпарат жинақтау, мағынаны ұғыну және оның мәнін анықтау, шынайылықты өзгеше түсіну және түсіндіру тәртібі ретінде. Осы аталған оқу үдерісінің нәтижелерін қарастыра отырып, жартыжыл бойы мен не істедім, не байқадым, нені, қалай өзгерттім және қандай қиыншылықтарға тап болдым, алдағы уақытта оқу үдерісінің оқу үдерісін қалай жүргіземін деген сұрақтарға тоқталып кетуді жөн көріп отырмын.
«Жертану» атты факультатив сабақтарымды аптасына бір реттен 5е сыныбымен өткіздім. Сабақтарымда тиімді, қолжетімді, ең бастысы балаларға түсінікті болуы үшін тиімді әдіс-тәсілдерді пайдаландым. Әрине, бірінші келгенде сынып климаты мен сыныптың оқу үлгерім деңгейін толық таныс болдым және меңгердім демеймін. Бірақ та, әрбір сабағымда модульдерді тиімді пайдалануды мақсат тұттым. Оқушылардың функционалдық сауаттылығы мен пәнге деген қызығушылығын арттыру арқылы сыныпты сыни тұрғыдан ойлауға үйрету-басты міндеттерімнің бірі болды. Ең бастысы, өзім берген білім болашақта оқушының өзінің іс-тәжірибесінде (өмірінде) қолдана ала ма?-деген сұрақ мазалайды. Барлығы оңай болмайды, ең бастысы сабақ мақсатын дұрыс қоя білген мұғалім ғана, күтілетін нәтижеге жете алады. Әрқашан оқушылармен бірге сабақ барысын бақылауға тырыстым. Оқушыларды сырттай бақылау нәтижесінде бір байқағаным, кез-келген сынып топтық, жұптық жұмыс жасауға дайын. Тек дұрыс бағдарлай білсе болғаны, әрине, барлығы талантты, дарынды балалар деп те айта алмаймын. Үлгерімі төмен балалар да болды. Сол сыныпты қалай топтық жұмысқа тартуға және де үлгерімі төмен оқушыларға деңгейлік тапсырмалар мен сұрақтар жас ерекшеліктеріне қарай тиімді пайдалану-басты назарымда болды. Өзімнің әрбір сабағымда ең бірінші оқушылардан кері байланыс алудан бастадым.
Сабақтың мақсаты мен тақырыбын ашуда «Миға шабуыл», Ой қозғау», «еркін талқылау» әдістері арқылы сұрақтар қою барысында маған оқушылардың өз жауаптарын жүйелі жеткізе алмаса да әңгімеге қатысқаны қатты қуантты. Егерде біз осылай үнемі жасап тұрсақ, оқушылар өз пікірлерімен білімдерін дұрыс жеткізуді үйренеді. Миға шабуыл әдісін әрбір сабақта қолданғанда оқушыларды бағдаршам арқылы өзара бағалап отырдым. Сыни тұрғыдан ойлауға, жас ерекшеліктеріне қарай тапсырмалар мен сұрақтар беру, оқудағы бағалау, жұптық, топтық жұмыстар, оқушыларды диалогқа кіріктіру, жоспарлаған мақсатымның ажырамас бөлігі болды.
