Қазақтың құт қонып, қыдыр дарыған, табиғатымен талай жанды тамсандырған көрікті жерлерінің өте көп екендігіне мемлекет басшысының «Болашаққа бағдар: рухани жаңғыру атты бағдарламалық мақаласы аясында Қазақстан Республикасы Президентінің қоры «Kazakh Tourism» АҚ ұйымдастыруымен «Көшбасшы жолы» атты экскурсиялық туры барысында Алматы облысы мен Елбасының туған жеріне саяхатқа қатысу арқылы көзім әбден жетті. Бұл бағдарлама кіші отанның жаңғыруы арқылы жалпыұлттық патриотизмің қалыптасуына бағытталған. Ол өлкетану, өлкетанулық мұражайлар жүйесін дамытуға негізделіп, білім беру жүйесінде орта мектептердің бағдарламаларында туған өлкені зерттеуден бастау алады. Әрбір мекен өзінің қаһармандары мен тарихи орындарына бай. Сол себептен әрбір аймақта аймақтық тарихты оқытуды, мәдени және тарихи ескерткіштерді және жергілікті ауқымдағы мәдени нысандарды қайта қалпына келтіруді ұйымдастыру қажет. Бұл жоба жастар арасында туризмді жандандыруға мүмкіндік беріп, жас ұрпақты отансүйгіштікке баулиды.
Алматы бізді құшақ жая, өзінің жағымды ауа райымен қарсы алды. Тарихы мың жылдан асқан қалаға жасаған алғашқы экскурсиялық саяхатымыз ҚР Орталық мемлекеттік мұражайынан бастау алды. Мұражайға кіргеннен көзімізге «Алтын адам» бейнесі сап ете түсті. Құдды бір байлықтың үстіне түскендей ерекше сезім бойды керней кетті. Әрі қарай мұражайдың сәнін кіргізіп тұрған құнды дүниелермен танысып, бойымызға қаншама рухани дүние сіңірдік десеңізші, шіркін! Бұл сезім бөлек қой! Бұл мұражайды ресми сайты арқылы онлайн режімде аралап шығуға да болады. Бірақ шынын айтқанда, дәл осылай өз көзіңмен көргендей болмайтындығы бесенеден белгілі дүние. Экскурсиялық саяхаттың кезекті объектілерінің бірі, бірі әрі бірегейі жиырма сегіз панфиловшылардың саябағы болды. Бұл жәй ғана кезекті экскурсиялық орын емес, бұл тарихтың қайнар көзі сарқырап ағып жатқан бұлақ іспеттес орын. Бұл жерге келген адамның бойын бірден жаужүрек соғыс құрбандарының рухы шарпып, қосыла шырқалып тұрған жеңіс әуендері сол рухты одан әрмен асқақтатып, жаныңа ләззат бір сезім сыйлайды. Саяхат барысында салиқалы саясат жүргізіп отырған кемеңгер көшбасшымыздың оқыған білім ордасы Қарасай батыр атындағы мектепке бардық. Білесіз бе, ондағы оқушылардың өз ойын нақты, терең мағыналы әрі көркем жеткізе білетіндігі, шешен де ойлы сөйлей білетіні, Абайша сілтегенде жүрекке жылы тиетін, «айнасы теп – тегіс жұмыр келетін» сөз құдіретін игергендігі мені тәнті етті. Елбасымыздың ғұмырын жатқа білетін бұл оқушылармен бірге оқығым келіп те кеткендігі рас. Көшбасшымыз көрсеткен көкжиек — үздіксіз табысқа жету үлгісі. Меніңше, олар «Елбасымыз Н.Назарбаев оқыған мектептің оқушылары» деген атқа әбден лайық! Осы саяхатта маған нағыз әсер қалдырған ата-бабамыздың шұғылалы арманы, сарғайып күткен сағынышы, елдігіміздің белгісі, тәуелсіздігіміздің нышаны іспеттес ескерткішіміз «Тәуелсіздік» монументі болды. Кере қарыс маңдайынан ғарышқа ұзын жол салып, сұңғыла сертінде бодандық булыққан, ал дұғалы сөзінде азаттық аңқыған арыстан жүректі, абадан мінезді тәуелсіздіктің көк түтінін көкке көтерген тәуелсіздік құрбандары құрметіне тұрғызылған бұл монументтің архитектуралық мағынасы тереңде. Өзекті өртке ораған қоғамда өз үйімізге өзіміз өгей болып, желтоқсанда жастығы жалын атқан желтоқсан боздақтарына арнап жыл сайын ашық сабақтар өтетінбіз. Сол сабақтарда міндетті түрде сол ар құнын құлпыртып, кешегі керауыз сатқынды састырып, бүгінгі сорауыз жалтаққа қастығып, көңілдің көгінде қырандай сусылдап, жүректің қобызын күңіренткен тәуелсіздігіміздің нышаны болған осы ескерткіш жайлы сөз кететін. Мен бұл күнге дейін аталмыш ескерткішке аса мән бере қоймапппын, тек сол бір сәтте көрген тарихи ескерткішім биылғы өткен іс-шараларда көрсетілген көріністерде көзіме елеңдей түсіп, еліміз аңсап жеткен тәуелсіздігінің мағынасын енді ғана толық түсінгендей болдым. Әсем шаһардың топырағын толғатып, жібектей желімен сырласып, шөбімен, тауымен, құсымен мұңдасып тұрған бұл тарихи ескерткіш жайлы жаза берсем де алған әсерімнің шын бейнесі шыға қоймас.
Қорыта айтқанда, біз — Алтайдан Атырауға, Сарыарқадан Алатауға дейін созылып жатқан ұлан-ғайыр даланы мекен еткен қайсар халықтың ұрпағымыз. Бұл бейбіт өлке бізге ата-бабамыздың ақ білектің күшімен, ақ найзаның ұшымен қорғап, аманатқа қалдырған баға жетпес мұрасы. Адамның ғұмырымен қатар келетін, еш толас таппайтын, ырыс пен мол қазынаның қайнар көзі, тіршіліктің құт берекесі, адамның игілігі үшін жаратылған жаратылыстың сыйы осынау қазақтың тұмса табиғатының өзгеше екендігін саяхат арқасында түсінгендей болдым десем, артық айтқандығым емес. Қазақ жері табиғаты көркем, тауы мен даласы жанға жайлы мекендерге кенде емес. Жер жәннаты Жетісу, шыңдары көк тіреген Алтай, емдік қасиеті де, шипасы да мол Алакөл, көрген көзді таң қалдырар Балқаш… айта берсек көп. Бірақ Қазақтың көркем табиғатының қызығын қазақ неге көрмейді? Қазақтың сай даласы да сұлулыққа бай. Біз ғана емес, бүкіл әлем халқы жыл он ай демалыс іздесе, елімізге келсін. Не іздесе де, қазақ даласынан табылады. Бірақ, өзгені қойып өзімізде сол табиғатты игілікке пайдалана алмай отырмыз. Бұл жайт көңілге өкініш тудырады. Ал осы алтын-жақұтқа бергісіз байлығымызды көпке таныту үшін мен аянып қалмаспын. Себебі, мен онымен мақтана, марқая өзге елдің өкіліне айта аламын. Осы саяхат маған бұрын соңды сезінбеген сезімді, сыйлады. Бұрын соңды алмаған рухани азық боларлық талай дүниені берді. Саяхат арқылы әрбір мекен өзінің қаһармандары мен тарихи орындарына бай екендігін ұқтым. Және бір ұққаным, тұмса табиғат – табыс көзі екен. Тек соны дұрыс жолға салып, отандық туризмнің қанат жайуына ықпал жасау керек. Мұны жасау мына менің, сенің және оның, яғни өскелең ұрпақтың қолында. Ал бұл жоба сол нәрсені біз жан дүниемізбен түсініп, шын ықыласпен ұғыну үшін жасалған өте пайдалы жоба болды деп нық сеніммен айта аламын. Осындай тарихи-мәдени орындар мол шоғырланған отаным Қазақстанның кең даласын, тауларын, шыңдарына қанатын тіреген бұлттарын, мөлдір көлдерін шын сүйе білетін адам оның нағыз «Саяхат елі» екендігіне шүбә келтірмейтіндігі анық!
